Hugsa!!!!

Viðbrögð þau sem mátt hefur lesa um þessa frétt eru alveg hreint skelfileg.  Ég vil þó taka skýrt fram að ég er ekki með nokkrum hætti að gera lítið úr alvarleika umrædds atviks.  En;

• af hverju er þessi ökumaður meiri glæpamaður en allir hinir sem dag eftir dag brjóta umferðarlögin og stofna sér og samborgurum sínum í hættu?
• er það vegna þess, að við lítum alltaf svo á, að brot hafi ekki verið framið fyr en slys hefur hlotist af?
• er hraðakstur hið eina sem er hættulegt í umferðinni?
• hvaða máli skiptir að ökutækið var BMW?  Eru þetta einhverskonar kynþáttafordómar í garð ökutækja?
• Þið, sem með lyklaborðinu dæmið svona harkalega; lítið í eigin barm.  Getur verið að þið eigið til að brjóta umferðarreglurnar og stofna þannig fólki í hættu?

Það er hárrétt að umferðarmenning á Íslandi og umferðarhegðun Íslendingar er um margt stórgölluð.  Hvorugt verður þó bætt með svona upphrópunum.  Hið eina, sem til gagns getur orðið er samstaða um að virða reglur, allar reglur, hæfilegt umburðarlyndi og almenn tillitssemi.

Verum öll vakandi í umferðinni, með ljósum, notum stefnuljósin, notum ekki gemsann, höfum hugann við það sem við erum að gera. 

 

Lögreglan: Ótrúlegt að ekki skyldi verða stórslys

Athugasemdir

[ellismellur (IP-tala skráð) 24.10.2007 kl. 09:29]

Athyglisvert að það sé þó einn enstaklingur, sem hefur hugsað áður en hann skrifaði. Tek undir með þér með upphrópanir og refsikröfur, við erum enn (held ég) í réttarríki og dómar eiga að vera kveðnir upp af réttum aðilum. Hitt er annað mál, að þegar jafn augljós dómgreindarskortur verður hjá ökumönnum og sá sem leiðir til svona hegðunar undir stýri, þá verður manni ósjálfrátt hugsað til aðvörunarorða Karls Steinars Valssonar í gær um stórfellda aukningu á notkun örvandi efna eins og amfetamíns en sér í lagi e-pillu. - En daglega eru hinsvegar einstaklingar að sleppa með vítaverða hegðun gagnvart samborgurum sínum í umferðinni, það er hárrétt hjá hhauki.  

[Mats Wibe Lund (IP-tala skráð) 24.10.2007 kl. 09:32]

Frábært innlegg til umhugsunar!

[Ellert (IP-tala skráð) 24.10.2007 kl. 11:25]

Má kannski bæta einu inn í þetta innlegg, hversu margir af þeim sem eru með sleggjudóma ætli hafi farið yfir á rauðu? Svo virðist sem Íslendingar skilji ekki notkun ljósa, Grænt = áfram Gult = gefa í Rautt = láta vaða og vona það besta. Og þetta er að gerast á mesta umferðartíma, ekki á kvöldin eða næturnar..........

 Það eru ótrúlega mögnuð atvik sem maður hefur orðið vitni að, og í raun mun meira kraftaverk að ekki hafi orðið margföld dauðaslys vegna þeirra aðila sem þetta stunda.

 Bara umhugsunarefni fyrir múginn.

[Stefán (IP-tala skráð) 24.10.2007 kl. 12:13]

Satt segir þú Ellert, en hvernig er það með íslenska ökukennara nú til dags, eru þeir hættir að leggja áherslu á lit ljósa og stefnuljós ? Allavega virðast bílstjórar úti í Evrópu nota stefnuljós meira en við.